Por incrible que pareza para quen non o coñeza, o rego Barxa está en Vigo. A 20-25 min en bici do Casco Vello. Entre Castrelos, Sárdoma e Beade.
O paseo é precioso. O rego ten varios saltos de auga, minifervenzas, está envolto por un frondoso bosque polo que apenas se colan os raios de sol, e incluso ten un muiño máis ou menos enteiro.
Como tantas e tantas cousas fermosas en Vigo, está esquecida e apartada. Sen camiños definidos. Con certo aroma decadente. Debo confesar que eu tampouco o coñecía ata hai ben pouco.
Quizáis mellor así: dunha banda, non se masifica e non se altera nin se ensucia de porcallada. E dutra banda, o Concello non o destroza pretendendo poñelo en valor.
Máis agora está en perigo. O trazado do Vial OP010 (proxectado entre Bembrive e Pereiró, pasando por Beade e Castrelos) queda preocupantemente preto deste oasis urbano. E non ten ningún nivel de protección.
Si xa se fan desfeitas nas zonas que - teóricamente - están protexidas (vexase Cabo Estai, ou o propio Casco Vello)... que non vai pasar aquí?
O Vial OP010 non ten ningún tipo de estudo de impacto ambiental (para variar en Vigo) . Non se sabe como poden afectar as obras a este patrimonio natural das viguesas e vigueses.
O máis triste de todo, é que tampouco se estudou, ou se xustificou debidamente, a necesidade deste vial.
Vigo é a cidade máis ruidosa de España. Tamén a que máis coches ten por habitante. E as soluciones que aporta este concello para a movilidade, sempre son máis e máis infraestructuras para coches.
Vigo está pensada para moverse en vehículo particular. Nunca se atreven a cambiar de paradigma.
Da igual a axenda 2030 da Unión Europea, da igual a lei de transición ecolóxica, da igual o cambio climático. Vigo é os que o gobernan son cochecentristas.
Por eso queren facer este vial sen moita explicación; é para aforrar 5 min aos coches: está xustificado. Estrague o que estrague. O vehículo é a prioridade.
Causa xenreira e frustración ver como sempre que a veciñanza se organiza para ofrecer alternativas e esixir explicaciones é ninguneada polo alcalde e o Concello.
Non acabo de entender ese desprezo por xente que ama Vigo e tenta protexelo. E que non ten partidos políticos nin medios de comunicación detrás para defenderse.
A xente do centro eran tres señoritos, a xente do rural son catro terratenientes. Para o concello a participación cidadá consiste en votar cada catro anos, e pasar o periodo entre unhas elecións e as seguintes cos ollos vendados e a boca pechada. Todo aquel que non aplauda é antivigués e vai en contra do "progreso" da cidade.
Todo o meu apoio a AVIBE (asociación en contra do vial). O seu éxito será o éxito de tod@s. Xa que, se conseguen tumbar o vial, e quitalo do PXOM, salvarán o noso rural deste ataque inxustificado. Tamén salvarán o Barxa, se a súa reivindicación de convertilo en nivel de protección ENIL prospera. Isto vai no interese de todas as viguesas e vigueses. Tod@s deberíamos apoiar a AVIBE.
As dificultades que teñen son grandes: un concello orgulloso, prepotente e opaco, o seu rodillo, a mentalidade procoche da cidadanía... Máis están demostrando que son capaces. Ogallá manteñan a forza, salven o seu entorno de vida, e de paso, ecosistemas coma o do Rego Barxa.
Todas as fotos desta entrada foron feitas no entorno do Rego Barxa, nas Relfas. Cedo todos os dereitos de reproducción destas imaxes, coa única condición que o uso sexa para informar do perigo que corre este entorno, ou para reivindicacións contra o vial OP010.
Para ver outras zonas polas que pasa enriba o vial, ver aquí.